這個月都在收拾那已經算是結了業的工作室, 過程中發現了好些有趣的東西 :-)
去年二月, 被舊老闆「老屈」我替她拍廣告, 為什麼我說是「老屈」? 因為當我一聽舊老闆說是要我扮演一名十九歲的高考生時, 我真的嚇得「花容失色」, 連連在電話裏說:「唔得唔得! 會嚇死街坊o架! 你又冇錢做『特技』, 將我返老還童, 咁樣真係好唔『環保』o架!」
「又關環保事?」
「絕對有礙市容啊!」
「呃……都係唔得, 係你o架啦!」
「點解啊? 成街都係十九歲美少女, 合埋眼搵個model都好過我好多啦!」
「個角色好多對白o架, 星期一就拍, 而且得一個shooting day, 幾乎每個take都一定要one take搞掂, 今日已經係星期六, 我揀得妹妹仔o黎, 佢地都冇時間背對白, 就算背到, 都一定唔可能下下one take, 仲有……妹妹仔大多數都好多懶音, 但你知我老闆係邊個? 係全香港最注重發音o既何文滙博士啊! 你想我死咩!」
「呃……去演藝搵啦!」
「你咪係演藝出品囉! 另一個主角都係呀, 林娜呀, 你師妹!」
「但……林娜都細過我丫……」
「所以林娜扮十八, 你扮十九!」
「嗄???」
以下就是製成品^^。這是平面廣告(可按圖放大), 照片中的我 suppose是二十三歲(因為已經大學畢業了), 甜美的林娜, 則suppose比我年輕一歲。
至於那條廣告片, 其實是類似電視廣告雜誌的廣告片子(即係「2036靈芝苞子」個d, 我就係司棋姐啦! 哇卡卡~~), 足足有二十分鐘長, 大概會在一些教育博覽會裏看到吧, 又或者會在一些中學裏播放……總之, 如果我的大學同學是教中學的, 某天, 可能赫然發現我竟仍在「扮細路」, 我相信他/她們受到的衝擊應該不輕啊! =p
其實拍攝那天, 我和林娜都已經不停在自嘲自己實在距離十八十九一百幾廿年的了, 我們請攝影師一定要拍wide shot, 又請打燈師要打足face light……我們啊(尤其是我), 都已經儘力環保的啦!^^
